तिब्बतमा ताल फुटेको सूचना आएसंगै नारायणी नदी किनारमा जान रोक लगाइयो

रसुवा माथि तिब्बतमा ताल फुटेको सूचना आएपछि चितवनको नारायणी नदी तटीय क्षेत्रमा बसोबास गर्दै आएका स्थानीयबासीलाई सुरक्षित स्थानमा सार्न थालिएको छ । 

बुधबार ताल फुटेर आएको ठुलो बाढीले अकल्पनीय जनधनको क्षति भएको थियो । शुक्रबार पनि ताल फुटेको सूचना आएलगत्तै नदी छेउ किनारमा जान रोक लगाइएको र सुरक्षित स्थानमा बस्न अनुरोध गरिएको हो ।

जिल्ला प्रहरी कार्यालय चितवनका प्रमुख रामेश्वर पौडेलले नारायणी नदी छेउछाउमा व्यापार व्यवसायी गर्न र नदी किनारमा जान रोक लगाइएको जानकारी दिएका छन् ।

नारायणगढको बजार नजिकै नदी किनारमा बाढी हेर्न गएका स्थानीयलाई शुक्रबार दिउसो १२ः३० बजेबाट माइकिङ गरेर सुरक्षित स्थानमा जान अनुरोध गरिएको उनको भनाइ छ । 

नारायणगढ बजारदेखि दक्षिण तर्फको शिवघाट, मङ्गलपुर, शरणपुर हुँदै मेघौली क्षेत्रसम्म नदी किनारमा नजान र सुरक्षित स्थानमा बस्न सूचना प्रवाह गरिएको पौडेलले बताए ।  

चितवन र आसपास मौसम बदली हुने अवस्था रहेको छ । आकासमा कालो बादर मडारिएकाले पानी पर्ने भएपछि थप नदीमा बाढी आउनसक्ने अनुमान गरिएकाले सतर्क रहन प्रशासनले अनुरोध गरेको छ । गोरखापत्र