अराजक गतिविधिमा संलग्न २७ जना पक्राउ

पछिल्लो १२ घण्टामा विध्वंसात्मक तथा अराजक गतिविधिमा संलग्न २७ जना पक्राउ परेका छन् । नेपाली सेनालगायत अन्य सुरक्षा निकायहरू देशभर परिचालनमा रहेपछि उनीहरु पक्राउ परेका हुन् ।

सेनाले जारी गरेको सुरक्षासम्बन्धी विवरण अनुसार मिति २०८२ भदौ २४ गते राति १० बजेदेखि भदौ २५ गते बिहान १० बजेसम्म काठमाडौँसहित देशका विभिन्न स्थानमा लुटपाट, आगजनी र जीउधनको क्षति पुर्‍याउने उद्देश्यले संलग्न व्यक्तिहरू पक्राउ गरिएको हो ।

यस अवधिमा ३ वटा बारुण यन्त्र प्रयोग गरी आगजनी नियन्त्रण गरिएको जनाइएको छ । त्यस्तै, काठमाडौँको गौशाला–चाबहिल–बौद्ध क्षेत्रबाट लुटपाटमा संलग्न व्यक्तिहरूबाट ३३ लाख ७० हजार नगद बरामद गरिएको छ ।

सुरक्षा निकायले काठमाडौँका विभिन्न स्थानबाट २३ र पोखराबाट ८ नाल गरी विभिन्न प्रकारका ३१ नाल हतियारसहित म्यागजिन र गोलीगठ्ठा बरामद गरेको जनाएको छ ।

यसबीचमा सुरक्षाकर्मीसमेत घाइते भएका छन् । २३ जना नेपाल प्रहरी र ३ जना गैर सैनिक व्यक्तिको हाल सैनिक अस्पतालमा उपचार भइरहेको नेपाली सेनाले जनाएको छ ।

सेनाले विद्यमान परिस्थिति नियन्त्रणमा सबै सुरक्षा संयन्त्र सक्रिय रहेको र नागरिकलाई शान्ति सुरक्षामा सहयोग गर्न आह्वान गरेको छ ।