जोसुकै होस्, भ्रष्टाचार गरे नछोड्ने प्रम कार्कीको चेतावनी

प्रधानमन्त्री सुशीला कार्कीले भ्रष्टाचारमा संलग्न जोसुकैलाई नछोड्ने चेतावनी दिएकी छिन् । भ्रष्टाचारविरुद्धको २२औँ अन्तर्राष्ट्रिय दिवसको अवसरमा मंगलबार एक सन्देश जारी गर्दै उनले यस्तो बताएकी हुन् ।

सन्देशमा प्रधानमन्त्री कार्कीले भनेकी छिन्, ‘यो सरकार चुनावी सरकार मात्र होइन । सुशासनको माग राखी भएको जेनजी आन्दोलनको जगमा बनेको सरकार हो । सरकारले नियमित कार्यसँगसँगै सुशासनका निम्ति तीव्र गतिमा काम गरिरहेको छ ।’

उनले अगाडि भनिन्, ‘जेनजीका माग र अपेक्षा बमोजिमका आशातीत उपलब्धि हासिल हुन समय लाग्ला तर भ्रष्टाचारविरुद्ध जुनसुकै हदसम्मको कठोर कदम चाल्न पनि सरकार पछि हट्ने छैन । यसका निम्ति राज्यका स्थापित सयन्त्र क्रियाशील भइसकेका छन् ।’

उनले भ्रष्टाचार नियन्त्रण एउटा निकायको मात्र जिम्मेवारी नभएको र प्रत्येक कार्यालयको प्रमुख आफैँ जिम्मेवार हुने बताइन् । सबैलाई आग्रह गर्दै उनले भनेकी छन्, ‘यस दिशामा चालिएका कदमबाट अत्तालिएर कतिपय तत्त्वले प्रत्यक्ष वा परोक्ष रूपमा धम्क्याए पनि हामी डराउँदैनौँ । सम्बन्धित निकायका पदाधिकारी र राष्ट्रसेवकहरूलाई पनि कत्ति पनि विचलित नभई निर्धक्कसँग आफ्नो व्यावसायिक स्वतन्त्रता उपयोग गरी अघि बढ्न म आग्रह गर्छु ।’

प्रधानमन्त्रीले भ्रष्टाचारको समूल अन्त्यका लागि तीनै तहका सरकार, निजी क्षेत्र, नागरिक समाज र आम नागरिक सबैको सहकार्य आवश्यक रहेको र सरकार त्यसका लागि दृढतापूर्वक अघि बढिरहेको उल्लेख गरेकी छिन् । नागरिकन्युज