सामाजिक सञ्जालमार्फत खानेपानी मन्त्री प्रदीप यादवले राजीनामाको घोषणा

खानेपानी मन्त्री प्रदीप यादवले आफ्नो पदबाट राजीनामा दिएका छन् । मन्त्री यादवले सामाजिक सञ्जालमार्फत आफ्नो पदबाट राजीनामाको घोषणा गरेका हुन् ।

‘हिजो जेनजी युवा पुस्ताले गरेको आन्दोलनको समर्थन र सरकार र प्रशासनद्वारा गरिएको दमनको विरोध गर्दै म आफ्नो खानेपानी मन्त्रालयको मन्त्री पदबाट राजिनामा दिने घोषणा गर्दछु’ मन्त्री यादवले सामाजिक सञ्जालमार्फत जानकारी दिएका छन् ।

जेनजीहरूको प्रदर्शनका क्रममा सोमबार १९ जना युवाले ज्यान गुमाएको घटनापछि सरकारमा बस्न उपयुक्त नहुने भन्दै मन्त्री यादवले राजीनामा दिएको उनको स्वकीय सचिवालयले जनाएको हो ।

‘प्रिय युवा भाइ बहिनीहरू तपाईँ नै मेरो प्रथम सहयोगी र मेरो जोश र ऊर्जाका सूत्रधार हुनुहुन्छ । हामी सबैलाई संयमता अपनाई युवा पुस्तालाई सही मार्ग दर्शन दिन र सहयोग गर्न अपिल गर्दछु,’ उनले भनेका छन्।