ज्येष्ठ सदस्य केसीद्वारा शपथ ग्रहण गराउने तयारी

नवनिर्वाचित सांसदलाई प्रतिनिधि सभाका ज्येष्ठ सदस्य ७८ वर्षीय अर्जुननरसिंह केसीले शपथ ग्रहण गराउने तयारी गरेको छ । केसीले बुधबार राष्ट्रपति भवन शीतल निवासमा राष्ट्रपति रामचन्द्र पौडेल समक्ष शपथ ग्रहण गरे पश्चात आज नवनिर्वाचित सांसदलाई केसीले शपथ ग्रहण गराउने तयारी थालेको हो ।

शपथ समारोहपछि सांसदहरुलाई संसद् प्रतीक चिह्न, संविधान, नियमावली र सेवा सुविधासम्बन्धी सामग्री उपलब्ध गराइनेछ । सचिवालयका प्रवक्ता एकराम गिरीले निर्माणाधीन संसद् भवनको बहुउद्देश्यीय हलमा शपथ र प्रारम्भिक बैठकका लागि तयारी भइरहेको जानकारी दिएका छन् ।

संघीय संसद् सचिवालय नवनिर्वाचित प्रतिनिधि सभा सदस्यको पद तथा गोपनीयताको शपथ समारोह बिहीबार अपराह्न २ बजे आयोजना हुने योजना छ । सहभागी सदस्यहरुलाई निर्धारित समयभन्दा दुई घण्टा अगावै उपस्थित हुन सचिवालयले अनुरोध गरेको छ । तस्विर: गोरखापत्रअनलाइन