भक्तपुरमा भेटिएका मृत कागमा बर्ड फ्लु भएको पुष्टि

भक्तपुर, भक्तपुर नगरपालिका वडा नं. ८ स्थित माहेश्वरी पीठमा भेटिएका मृत कागमा बर्ड फ्लु पुष्टि भएको छ । शुक्रबार भक्तपुर नगरपालिकाले एक सूचना मार्फत सो मृत कागमा बर्ड फ्लु पुष्टि भएका जानकारी दिएको हो ।

पीठमा धेरै संख्यामा कागहरु मृत अवस्थामा भेटिएकोले केही काग नमूना परीक्षणको लागि केन्द्रीय पशुपन्छी रोग अन्वेषण प्रयोगशाला पठाइएकोमा H9 भ्येरियन्टको बर्ड फ्लु देखिएको जनाइएको छ ।

H9 भ्येरियन्ट कुखुरा लगायत विभिन्न पन्छीहरुमा सर्न सक्ने र विशेष गरी संक्रमित कुखुरा तथा पन्छीसँग प्रत्यक्ष सम्पर्क, संक्रमित पन्छी तथा पन्छीजन्य पदार्थको ओसार पसार, दाना तथा कुखुरा ढुवानी गर्ने सवारी साधन साथै श्वास प्रश्वासबाट सर्ने सूचनामा उल्लेख गरिएको छ ।

यस भ्येरियन्टको बर्ड फ्लुले मानव स्वास्थ्यमा असर नगर्ने भएता पनि आफुले पालेका पन्छीहरुमा सर्न सक्ने भएकोले सम्बन्धित कुखुरा तथा पशुपन्छी व्यवसायीहरुले आफुले पालेका पन्छीहरुलाई सुरक्षित राख्नका लागि सावधानी अपनाउनुहुन र आफ्‌नो वरपर कुनै पनि सामुदायिक पन्छीहरु मृत फेला परेमा यस नगरपालिकाका सफाई कर्मचारीहरुलाई सम्पर्क गरी उचित व्यवस्थापन गराउन नगरपालिकाले सम्पुर्ण नगरबासीलाई अनुरोध गरेको छ ।