भक्तपुरमा टिपरको ठक्करबाट एकको मृत्यु

भक्तपुरमा टिपरको ठक्करबाट एक जना पैदलयात्रीको मृत्यु भएको छ । भक्तपुर नगरपालिका–५ आदर्शस्थित अरनिको राजमार्गमा टिपरको ठक्करबाट एक पैदलयात्रीको मृत्यु भएको हो ।

दुर्घटनामा परी मृत्यु हुनेमा भारतको दरभंगा जिल्ला घर भई हाल चाँगुनारायण-८, सुडालस्थित BM ईट्टा भट्टामा कार्यरत ४३ वर्षीय विसुनदेव सहनी रहेका छन् । बाटो काट्दै गरेका सहनीलाई सूर्यविनायकबाट तीव्र गतिमा जगातीतर्फ जाँदै गरेको बा ४ ख ३१५६ नम्बरको टिपरले आइतबार राती ११:०० बजे ठक्कर दिएको थियो ।

ठक्करबाट गम्भीर घाइते भएका उनलाई तत्काल उपचारका लागि भक्तपुर अस्पताल दुधपाटी लगिएको र चिकित्सकले राती ११:२२ बजे नै मृत घोषित गरेको जिल्ला प्रहरी परिसर भक्तपुरले जनाएको छ ।

जिल्ला प्रहरी परिसर भक्तपुरका अनुसार टिपर चालक काभ्रेपलाञ्चोक बनेपा बस्ने ३६ वर्षीय श्याम कुमार तामाङलाई प्रहरीले नियन्त्रणमा लिएको छ । घटनाका सम्बन्धमा प्रहरी वृत्त जगातीबाट थप अनुसन्धान भइरहेको निमित्त सूचना अधिकारी प्रहरी निरीक्षक स्वरुप शर्माले जानकारी दिएका छन् ।