प्रेस स्वतन्त्रता हननका ६४ घटना सार्वजनिक, बाग्मती प्रदेशमा मात्रै २६ घटना

भक्तपुर: प्रेस काउन्सिल नेपालले प्रेस स्वतन्त्रता हननका ६४ घटना सार्वजनिक गरेको छ । मिति २०८१ वैशाख १ गतेदेखि चैत मसान्तसम्म गरेको अनुगमनमा प्रेस स्वतन्त्रता हननका ६४ घटना देखिएका प्रेस काउन्सिल नेपालले जनाएको हो ।
यीमध्ये धम्की/दुर्व्यवहारका सवैभन्दा बढी (२३ घटना) रहेको छ । हत्याको एक घटना र शङ्कास्पद मृत्युको दुई घटना भएको पाइएको छ ।

यस्तै, कुटपिट/आकमणका १८, पेसागत असुरक्षा ११, हत्या प्रयास/गिरफ्तारी चार र कब्जा/अवरोधका चार घटना रहेका छन् । यस अवधिमा पत्रकार विस्थापनको एक घटना भएको पाइएको छ ।

प्रदेशअनुसार सवैभन्दा बढी बाग्मती प्रदेशमा २६ घटना भएको छ । मधेस प्रदेशमा १९, कोशीमा १०, सुदूरपश्चिममा छ, कर्णाली र गण्डकीमा दुई/दुई घटना भएको छ। अनुगमनका क्रममा एक वर्षमा लुम्बिनी प्रदेशमा प्रेस स्वतन्त्रता हननका घटना भएको देखिएको छैन । यस अवधिका घटनामा ६९ पुरुष र आठ जना महिला पीडित भएका छन् ।