जात्रामा जिब्रो छेड्ने व्यक्तिलाई प्रोत्साहन गर्ने प्रदेशको निर्णय

भक्तपुर, बागमती प्रदेश संस्कृति तथा पर्यटन मन्त्री माननीय सुरेश श्रेष्ठले जिब्रो छेड्ने जात्रामा जिब्रो छेड्ने व्यक्तिलाई प्रोत्साहन गर्ने निर्णय बागमती प्रदेशले गरेको जानकारी दिएका छन् । नेपाल रेडक्रस सोसाइटी आयोजना गरिएको स्थापना दिवसको कार्यक्रमलाई सम्बोधन गर्दै माननीय मन्त्री श्रेष्ठले उक्त जानकारी दिएका हुन् ।

मन्त्री श्रेष्ठले, “वर्षमा दुई पटक जिब्रो छेड्ने जात्रा कहिँ पनि छैन । यो भक्तपुरमा मात्रै छ । जिब्रो छेड्ने जात्रामा जिब्रो छेड्ने व्यक्तिलाई प्रोत्साहन गर्ने प्रदेशले निर्णय गरेको छ । “

संस्कृति जोगाउने कार्यमा पनि रेडक्रस जोडिएको बताउँदै माननीय श्रेष्ठले रगतमा लाग्ने खर्च सरकार र स्थानीय पालिका व्यहोर्ने कुरामा आफू विस्वस्त रहेको जनाएका छन् । नेपाल रेडक्रस सोसाइटी, जिल्ला शाखा भक्तपुर जिल्लाका स्थानीय जनतालाई नि:शुल्क रगत उपलब्ध गराउने पहिलो जिल्ला शाखा रहेको जिकिर माननीय श्रेष्ठले गरे ।

साथै रेडक्रस अन्तर्गत नै रहेर साहारा परियोजनाले चाँगुनारायण नगरपालिकामा गरेको मिलन चौतारीको कार्य सराहनीय रहेको र आगामी दिनमा यो कार्यलाई निरन्तरता दिन सकुन भन्ने शुभकामना समेत व्यक्त गरे । माननीय श्रेष्ठले भने, ” मिलन चौतारीको कार्य सराहनीय छ । यो कार्यलाई निरन्तरता दिन सकुन, शुभकामना छ । “