दोस्रो विश्व शिखर सम्मेलनका लागि राष्ट्रपति पौडेल दोहा प्रस्थान

राष्ट्रपति रामचन्द्र पौडेल नेपाली प्रतिनिधिमण्डलको नेतृत्व गर्दै दोस्रो विश्व शिखर सम्मेलनमा सहभागी हुन कतारको राजधानी दोहा प्रस्थान गरेका छन् । कार्तिक १८ देखि २० गतेसम्म आयोजना हुने ‘सामाजिक विकासका लागि दोस्रो विश्व शिखर सम्मेलन’ मा सहभागी हुन राष्ट्रपति पौडेल आज बिहान दोहा प्रस्थान गरेका हुन् ।

सम्मेलनमा सहभागी हुन राष्ट्रपति पौडेललाई कतारका अमिर शेख तमिम बिन हमद अल थानीले निमन्त्रणम गरेका थिए । गत बुधबार बसेको मन्त्रिपरिषद् बैठकले राष्ट्रपति पौडेलको कतार भ्रमण कार्यक्रमलाई स्वीकृत गर्ने निर्णय गरेको थियो ।

राष्ट्रपति पौडेलले कार्तिक १८ गते सम्मेलनको मुख्य सत्रलाई सम्बोधन गर्नुहुने कार्यसूची छ । सम्मेलनका क्रममा राष्ट्रपति पौडेलसँग कतारका अमिर र संयुक्त राष्ट्रसङ्घका महासचिव एन्टोनियो गुटेरेसलगायत विभिन्न विशिष्ट व्यक्तिहरूको भेटवार्ता हुनेछ ।

संयुक्त राष्ट्रसङ्घको निर्णयअनुसार यो दोस्रो सम्मेलन ३० वर्षपछि हुन लागेको हो । यसअघि पहिलो सम्मेलन सन् १९९५ मा डेनमार्कको कोपनहेगनमा भएको थियो । यसपटक कतारले सम्मेलन आयोजना गरेको हो ।

१२ सदस्यीय नेपाली प्रतिनिधिमण्डलमा उहाँका धर्मपत्नी सविता पौडेल, सञ्चारविज्ञ किरणकुमार पोखरेल, राष्ट्रपति कार्यालयका सचिव तथा नेपाल सरकारका अन्य वरिष्ठ अधिकारी सहभागी हुनुहुन्छ । राष्ट्रपति पौडेल भ्रमण पूरा गरी कार्तिक २० गते स्वदेश फर्कनुटहुने परराष्ट्र मन्त्रालयले जनाएको छ । गोरखापत्रअनलाइन