गोवाको नाइटक्लबमा आगलागी हुँदा चार जना नेपालीसहित २५ जनाको मृत्यु, चार जना पक्राउ

भारतको गोवास्थित पर्यटकीय रिसोर्ट क्षेत्रमा रहेको भारतीय नाइट क्लबमा आइतबार आगलागी हुँदा २५ जनाको मृत्यु भएको छ । आगलागीमा चार जना नेपालीसहित २५ जनाको मृत्यु भएको अधिकारीहरूले बताएका छन् ।

आइतबार गोवामा भएको आगलागीको घटनामा चार जना नेपाली नागरिकसहित २५ जनाको ज्यान गएको घटनाप्रति दुःख व्यक्त गर्दै नेपालका राजदूत शङ्कर शर्माले विज्ञप्ति जारी गर्नु भएको छ । उनले विज्ञप्ति मार्फत शोकाकुल परिवारप्रति समवेदना प्रकट गर्दै घाइतेको शीघ्र स्वास्थ्य लाभका लागि प्रार्थना गरेका छन् ।

मृतक मध्ये अधिकाशं भारतीय नागरिक रहेको र मुख्यतया नाइट क्लबका कर्मचारी, साथै नयाँ दिल्लीबाट छुट्टी मनाउन आएकाहरू रहेको जनाइएको छ । गाेवाको उत्तरमा रहेको अर्पोराको एउटा क्लबमा आगलागी भएको जनाउँदै अधिकारीहरूले विद्युतीय पटाखाले आगलागी गराएको हुन सक्ने बताएका छन् ।

क्लबको काठका भागबाट सुरु भएको आगलागी फैलिएपछि अधिकांशको मृत्यु भएको जनाइएको छ । गोवाका मुख्यमन्त्री प्रमोद सावन्तले घटनाको अनुसन्धानका लागि चार जनालाई पक्राउ गरिएको तथा अन्य नाइट क्लबमा अनुसन्धानको आदेश दिएको बताउनु भएको छ । रासस

तस्बिर: पितिआइ फोटो