मादी नदी किनारमा महिलाको बेवारिसे शव फेला

पाटनस्थित मादी नदीको किनारमा एक महिलाको बेवारिसे शव फेला परेको छ । तनहुँको व्यास नगरपालिका –५, माथिल्लो पाटनस्थित मादी नदीको किनारमा सो शव फेला परेको हो ।

नदीको पानीमा कोल्टो परेको अवस्थामा आइतबार शव भेटिएको जिल्ला प्रहरी कार्यालय तनहुँले जानेको छ । मृतक महिलाको नाम, थर, र ठेगाना (वतन) हालसम्म खुल्न सकेको छैन । सूचना अधिकारी तथा प्रहरी नायब उपरीक्षक श्रवणकुमार विकले मृत महिलाको उमेर अन्दाजी ४० वर्ष रहेको अनुमान गरिएको बताए ।

स्थानीय बासिन्दाले खबर गरेलगत्तै प्रहरी टोली घटनास्थलमा पुगेको थियो । प्रहरी निरीक्षक शिवप्रसाद पाठकको नेतृत्वमा खटिएको प्रहरी टोलीले घटनाको सम्बन्धमा आवश्यक अनुसन्धान कार्य अगाडि बढाइएको छ ।