रातभर जाग्राम बस्न बाध्य उदयपुरका गाउँले

उदयपुरमा जंगली हात्ती पसेर उपद्रो मच्चाउँदा गाउँले रातभर जाग्राम बस्न बाध्य भएका छन् । उदयपुरको चौदण्डीगढी नगरपालिका–१० हँडिया क्षेत्रमा रातको समयमा हात्ती गाउँ प्रवेश गरेर उपद्रो मच्चाए पछि गाउँले रातभर जाग्राम बस्न बाध्य भएका हुन् ।

दैनिक रातको समयमा हात्ती गाउँ प्रवेश गरेर घरमा थन्क्याएका खाद्यन्न तथा बालीमा नास गर्न थालेका स्थानीयवासीले गुनासो गरेका छन् । स्थानीयवासी श्यामनारायण चौधरीका अनुसार गत शनिबार रातिमात्र स्थानीय अमृत अधिकारीको घरको बार भत्काएर अन्न क्षति गरेको थियो । यसैगरी, स्थानीय पर्शुराम हुजदारले आफ्नो घरको भकारीमा राखेको धान हात्तीले क्षति गरेको जानकारी दिए । मध्यरातमा हात्ती प्रवेश गरेर घर वरिपरि बिरुवा खाने र भकारी भत्काएर धान खान थालेको उनले बताए ।

हात्ती रातको समयमा गाउँमा प्रवेश गर्न थालेपछि कतिपय गाउँले रातभरि आगो बालेर हात्ती धपाउन जाग्राम नै बस्नुपरेको स्थानीयवासी सीताराम चौधरीले बताए । चिसो बढेसँगै हात्ती गाउँ प्रवेश गरेर बिगार तथा उपद्रो गर्न थालेको स्थानीय बताउँछन् । रासस