जितेन्द्र रसिकको बाल उपन्यास “साइबोर्ग“ सार्वजनिक

साहित्यकार जितेन्द्र रसिकको १८ ओैँ कृति बाल उपन्यास “साइबोर्ग“ सार्वजनिक गरेको छ । बुधबार इर्टनल पब्लिकेसनका प्रकाशक यमुना पराजुली र एजुकेशन पब्लिसिङ बुक हाउस काठमाडौं जमलका प्रतिनिधि तथा व्यवस्थापकहरू शितल सुकुभटु, रमण राउट, भजन राउट लगायतले संयुक्तरूपमा उपन्यास लोकार्पण गरेका हुन् ।

साइबोर्ग उपन्यास साहित्यकार जितेन्द्र रसिकको विज्ञान उपन्यास हो । यो उपन्यासमा विज्ञानको उन्नतिले भविष्यमा कस्तो अवस्था सिर्जना हुन सक्छ भन्ने सुन्दर परिकल्पनाहरू समावेश रहेको प्रकाशक यमुना पराजुलीले जानकारी दिए । प्रविधिहरू, खासगरी आर्टिफिसिलय इन्टेलिजेन्सको चरम विकास हुँदै जांदा भाविष्यमा त्यसले मानव समुदाय माथि नै धावा बोल्ने त होइन भन्ने आशंकालाई यो विज्ञान उपन्यासने रोचक ढंगले उठाएको छ । के विज्ञानले मानिसलाई कहिल्यै नमर्ने बनाउन पनि सक्दछ ? भन्ने प्रश्नको पनि यसले तर्कसम्मत संभावनाहरू देखाएको पराजुलीको भनाइ छ ।

बालबालिका र किशोरकिशोरीमा कल्पना, जिज्ञासा र तर्कशीलता बढाउनका लागि यो पुस्तक प्रभावकारी बन्ने उपन्यासकार जितेन्द्र रसिकले बताएका छन् । यो बाल उपन्यासको मूल्य २५० रुपैयाँ रहेको छ ।

लोकार्पणसँगै बाल उपन्यास साइबोर्ग एजुकेशनल पब्लिसिङ बुक हाउस, रत्नपुस्तक भण्डार लगायतबाट उपन्यास बिक्रि थालिएको छ । इर्टनल पब्लिकेसन्स र एजुकेश्नल पब्लिसिङ बुक हाउसले सहकार्य थालेको हो । लेखक रसिकका यस अघि बाल साहित्यमा एलियनको पृथ्वी भ्रमण (बालकथासङ्ग्रह), हावा फल्ने रूख (सचित्र बालकथा), एङ्ग्री बर्ड (बालकथा सङ्ग्रह), बेलबहादुरसँग बिहे (सचित्र बालकथा ३ संस्करण), गुलेली (बालकथासङ्ग्रह), हनुमानको करामत (सचित्र बालकथा), जाडुगर एआई (सचित्र बालकथा) प्रकाशित छन् । रसिकको उपन्यास,गजल, संस्कृति, जीवनी लगायत विधामा ११ कृति प्रकाशित छन् । उनका करिव १ दर्जन गीत गजल पनि रेकर्ड भइसकेका छन् । उनी नेपालभाषा संस्कृति र साहित्यको क्षेत्रमा पनि सक्रिय रहेका छन् ।