जुद्ध वारुण यन्त्र भक्तपुरलाई सुरक्षा सामग्रीहरू हस्तान्तरण

भक्तपुर नगरपालिकाले भनपा वडा नं. १ दुधपाटी स्थित जुद्ध बारुण यन्त्र कार्यालय, भक्तपुरलाई सुरक्षा सामाग्रीहरु हस्तान्तरण गरेको छ । कार्यालयलाई आगलागी नियन्त्रण गर्न रु. ६ लाख ९३ हजार बराबरको सुरक्षा सामाग्रीहरु हस्तान्तरण गरेको हो ।

नगरपालिकाका प्रमुख सुनिल प्रजापतिले जुद्ध बारुण यन्त्र कार्यालय भक्तपुरका कार्यालय प्रमुख विजयप्रसाद धौभडेललाई मंगलबार एक कार्यक्रममा आगलागी नियन्त्रण गर्नका लागि SCBA (self Containing Breathing Apparatus) सेट २ थान र बुट १५ सेट उपलब्ध गराएको हो ।

नगर प्रमुख प्रजापतिले विपद्का सम्भावित दुर्घटनालाई ध्यानमा राखेर नगरपालिकाले सहयोग सामाग्री वितरण गर्दै आएको र यस कार्यालयले सक्रियतापूर्वक काम गरिरहेको बताए ।

जुद्ध बारुण यन्त्र कार्यालय भक्तपुरका कार्यालय प्रमुख विजयप्रसाद धौभडेलले जुद्ध बारुण यन्त्र कार्यालय सबैको साझा संस्था भएको बताउँदै आगलागी नियन्त्रण कार्यमा कुनै कमी कमजोरी हुन नदिने बताए । आगामी दिनमा पनि भक्तपुर नपाको साथ र सहयोगको अपेक्षा राख्दै उनले दक्ष जनशक्तिहरुबाट जुद्ध वारुण यन्त्र कार्यालयले सेवा प्रवाह गर्दै आएको जानकारी दिए ।