बागमती प्रदेशका मुख्यमन्त्री थापा मगरले जिते विश्वासको मत

बागमती प्रदेशका मुख्यमन्त्री किरण थापा मगरले विश्वासको मत प्राप्त गरेका छन् । मुख्यमन्त्री थापाले मंगलबार उक्त विश्वासको मत प्राप्त गरेका हुन् ।

मुख्यमन्त्री थापालाई सरकार टिकाउन ५३ मत आवश्यक थियो तर मंगलबार साँझ भएको मतदानमा ५७ मत पाएका छन् । उनले प्रदेशसभाको कुल उपस्थित ५८ सांसद मध्ये ५७ मत पाएका हुन् । मौजुदा संसद्को १०४ सदस्य मध्ये मुख्यमन्त्री थापाको विश्वासको मत सम्बन्धी प्रस्ताव माथिको छलफलमा सत्तारुढ ३ दलका ५८ सांसद मात्र उपस्थित थिए ।

विपक्षी दल कांग्रेसका ३६, नेमकिपाका ३ र हानेपाका २ सांसद बैठक बहिस्कार गर्दै बैठकमा सहभागी भएनन् । त्यसैगरी सरकार साझेदार दल राप्रपाका १२ मध्ये ५ सांसद पनि बैठकमा अनुपस्थित रहे । मुख्यमन्त्री थापाले राप्रपाका ७, नेकपाका २६ र एमालेका २६ मध्ये २५ जनाको विश्वासको मत प्राप्त गरेका हुन् । एमालेबाट उपसभामुख सहित २५ सांसद रहेकाले उपसभामुखले मत विभाजनमा सहभागिता जनाइनन् ।

विपक्षीको बहिस्कारका कारण उनको विश्वासको मत माथिको प्रस्तावको विपक्ष वा तटस्थमा कुनै पनि मत परेको थिएन ।