“बर्दी लगाएर बदमासी गर्ने अधिकार कसैलाई पनि छैन”

प्रहरी वृत्त ठिमीका प्रहरी नायव उपरीक्षक (डिएसपी) नवराज ढुंगानाले बर्दी लगाएर बदमासी गर्ने अधिकार कसैलाई नभएको बताउनुभयो । डिएसपी ढुंगानाले आज पत्रकारहरुसंगको भेटघाट तथा अन्तरक्रिया गर्ने क्रममा सो कुरा बताउनु भएको हो ।

उहाँले भन्नुभयो, “यहाँ बर्दी लगाएर बदमासी गर्ने अधिकार कसैलाई पनि छैन ।” कसैले बदमासी गरेको पाइएमा आवश्यक कारवाही गरिने उहाँको भनाइ छ ।

समाजमा घटेका घटनालाई प्रहरीले मात्र समाधान गर्न नसकिने उहाँले बताउनुभयो । उहाँले घटनाको खोज अनुसन्धान गर्न विभिन्न निकायसंग समन्वय गरी कार्य गर्न आवश्यक रहेको र सोही आवश्यकता अनुरूप समन्वय गरी आफ्नो कार्य अगाडी बढाउने विचार व्यक्त गर्नुभयो ।

डिएसपी नवराज ढुंगानाले अपराध मुक्त समाज बनाउन को निम्ति सबैसंग हातेमालो गर्दै अगाडी बढ्ने बताउनुभयो । “अपराध मुक्त समाज बनाउनको लागि हाम्रो तर्फबाट, हाम्रो प्रहरीको तर्फबाट सबैसँग हातेमालो गर्दै व्यवसायीक सम्बन्ध बनाएर अगाडि बढ्ने छौं ।”, डिएसपी ढुंगानाले भन्नुभयो ।