भक्तपुरमा दुईदिने घरेलु उत्पादन प्रवर्द्धन मेला सुरु

भक्तपुरमा दुईदिने घरेलु उत्पादन प्रवर्द्धन मेला सुरु भएको छ । भक्तपुर घरेलु तथा साना उद्योग संघको आयोजना तथा उद्योग वाणिज्य कार्यालयको सहकार्यमा भक्तपुरको नःपुखु परिसरमा दुईदिने घरेलु उत्पादन प्रवर्द्धन मेला २०८२ सुरु भएको हो ।

सो मेलाको उद्घाटन भक्तपुर नगरपालिकाका प्रमुख सुनिल प्रजापतिले गर्नु भएको थियो । मेलाको उद्घाटन गर्दै उहाँले भक्तपुरको कला संस्कृति, सम्पदा र मौलिक उत्पादन तथा जीवनशैलीबारे स्वदेशी र विदेशीलाई जानकारी गराउने उद्देश्य लिएर भक्तपुर नपाले भक्तपुर महोत्सव सम्पन्न गरेको बताउनुभयो ।

भक्तपुर अहिले पर्यटकीय नगरको रुपमा विकास भइरहेको र वर्षेनी करिब ३ लाख विदेशी पर्यटकहरुले भक्तपुर भ्रमण गर्ने गरेको तथ्यांक उल्लेख गर्दै उहाँले भक्तपुर नपाले आन्तरिक पर्यटन प्रवर्द्धनमा जोड दिँदै विभिन्न गतिविधि सञ्चालन गर्दै आएको जनाउनुभयो ।

विश्व व्यापार संगठनमा नेपाल सदस्य भएपछि घरेलु तथा साना उद्योगहरु ओझेलमा पर्दै आएको बताउँदै विदेशी सामानको आयातले घरेलु उद्योगहरु मारमा परेको उहाँको भनाइ छ ।

उद्यमीहरुबीच स्वस्थ प्रतिस्पर्धाको खाँचो रहेको तर्क राख्दै उहाँले युवाहरुलाई स्वदेशमै रोजगारीको व्यवस्था गर्न सके युवा विदेशिने क्रम रोकिने बताउनुभयो ।