“भक्तपुर कला र संस्कृतिले भरिएको खुल्ला संग्रहालय हो ।”

भक्तपुरका प्रमुख जिल्ला अधिकारी भरत मणी पाण्डेले भक्तपुर कला र संस्कृतिले भरिएको खुल्ला संग्रहालय भएको बताएका छन् । मंगलबार राष्ट्रिय कला संग्रहालय भक्तपुरको ६५ औं स्थापना दिवसको अवसरमा आयोजना गरिएको अन्तरक्रिया तथा क्षमता अभिवृद्धि कार्यक्रम प्रजिअ पाण्डेले यस्तो बताएका हुन् ।

प्रजिअ पाण्डेले भने, “भक्तपुर कला र संस्कृतिले भरिएको खुल्ला संग्रहालय हो । यसको संरक्षण र सम्बद्र्धन तीन तहकै सरकारको साझा दायित्व हो ।” उनलेे मल्लकालीन अवस्थादेखि रहेका संग्रहालयका कला कृतिहरुलाई नयाँ पुस्तामा हस्तान्तरण गर्दै लानु आवश्यक भएको बताए ।

भक्तपुरको सम्पदा संरक्षणमा भक्तपुर नगरपालिका र स्थानीय समुदायको ठूलो भूमिका रहेको उनको भनाइ छ ।

राष्ट्रिय कला संग्रहालय भक्तपुरमा हाल धातुकला, चित्रकला, प्रस्तरकला र काष्ठकलाका २१०० वटा कलात्मक वस्तु संग्रहित रहेका छन् ।