मालपोत कार्यालय भक्तपुरका प्रमुख सहित अन्य दुई जना पक्राउ

मालपोत कार्यालय भक्तपुरका प्रमुख सहित अन्य दुई जना पक्राउ परेका छन् । २४ लाखभन्दा माथिको रकम बराबरको घुस सहित मंगलबार भक्तपुरको मालपोत कार्यालयका प्रमुख र भूमिसुधारका अन्य दुई जना पक्राउ परेका हुन् ।

पक्राउ पर्नेमा मालपोत कार्यालय भक्तपुरका कार्यालय प्रमुख कुमार आचार्य, भूमिसुधार शाखाका नायब सुब्बा दिपक प्रसाद अधिकारी र कार्यालय सहयोगी टिकाराम राउत रहेको अख्तियार दुरुपयोग अनुसन्धान आयोगले विज्ञप्तिमार्फत जानकारी दिएको छ ।

आगोगका अनुसार कार्यालयबाट खटिई गएको टोलीले भूमि सुधार तथा मालपोत कार्यालय भक्तपुरका कार्यालय प्रमुख कुमार आचार्यको साथबाट मोवाइल डिभाइस २ थान र भूमिसुधार शाखाका नायब सुब्बा दिपक प्रसाद अधिकारीको साथबाट मोबाइल थान-१ तथा कार्यालय सहयोगी टिकाराम राउतको साथबाट मोवाइल थान-१ सहित घुस/रिसवत रकम रु. २४,५०,०००।- (चौबीस लाख पचास हजार रुपैयाँ) समेत भूमिसुधार तथा मालपोत कार्यालय भक्तपुरको परिसरबाट नियन्त्रणमा लिएको हो ।

आयोगले चाँगुनारायण नगरपालिकामा रहेको १४ रोपनी ४ आना जग्गा मोही र तलसिङको लगत कट्टा गरी सो जग्गा मोहीको नाममा जग्गा धनी प्रमाण पूर्जा बनाउने प्रयोजनार्थ घुस/रिसवत रु. २४,५०,०००।- (चौबीस लाख पचास हजार रुपैयाँ) माग गरेको भन्ने सूचना एवं उजुरी निवेदनको आधारमा अनुसन्धान गरेको जनाएको छ । आयोगका अनुसार उनीहरुलाई नियन्त्रणमा लिई थप अनुसन्धान भइरहेको जनाएको छ ।