मौलिक कला संस्कृति, सीप, सम्पदा संरक्षण गर्नु सबैको साझा कर्तव्य: मेयर प्रजापति

भक्तपुर, भक्तपुर नगरपालिकाका प्रमुख सुनिल प्रजापतिले मौलिक कला संस्कृति, सीप, सम्पदा संरक्षण गर्नु सबैको साझा कर्तव्य भएको बताएका छन् । बिहिबार भादगाउँले कालो टोपी उद्योग संघको प्रथम वार्षिक साधारणसभाको उद्घाटन गर्दै नगर प्रमुख प्रजापतिले यस्तो बताएका हुन् ।

भादगाउँले टोपीले भक्तपुरको विशेषता झल्काउने हुँदा यसको गुणस्तर कायम गर्नेतर्फ संघ प्रतिबद्ध हुनुपर्ने नगर प्रमुख प्रजापतिले जनाए । उनले भक्तपुर अध्ययन अनुसन्धान गर्नेहरुको लागि खुल्ला किताबको रुपमा रहेको बताउँदै कला संस्कृतिका जीवन्त प्रदर्शनीले भक्तपुरलाई खुल्ला संग्रहालयको रुपमा चित्रण गरिरहेको बताए ।

भक्तपुरको मौलिक सीप र कला नयाँ पुस्तामा पुस्तान्तरण गर्न सके पनि यसले जीवन्तता पाउने बताउँदै उनले विद्यार्थीहरुलाई विश्वविद्यालयको प्रमाणपत्रसँगसँगै सीपमूलक तालिमको प्रमाणपत्र दिने उद्देश्यले नपाले विभिन्न तालिम सञ्चालन गर्दै आएको जानकारी दिए ।

प्रमुख प्रजापतिले भने, “भक्तपुर नगरपालिकाले आत्मनिर्भरतालाई जोड दिँदै आएको छ, यहाँका युवा विद्यार्थीहरुलाई आफ्नो भविष्य विदेशमा होइन, आफ्नै देशमा मेहेनत गर्न सिकाउने प्रयत्न गरिरहेका छौं ।”