“हाम्रो सेरोफेरो तथा सामाजिक विषयक प्रदर्शनी–२०८२” सम्पन्न

भक्तपुर, सूर्यविनायक नगरपालिका वडा नं.४ दधिकोट भक्तपुरमा “हाम्रो सेरोफेरो तथा सामाजिक विषयक प्रदर्शनी–२०८२” सम्पन्न गरेको छ । शंकर नेशनल स्कूलले क्रमिक रुपमा कक्षामा गरिएका र अध्यापन भएका पाठ्यवस्तुहरूको आधारमा यश पटक “हाम्रो सेरोफेरो तथा सामाजिक विषयक प्रदर्शनी–२०८२” सम्पन्न गरेको हो ।

स्कूलले पाठ्यवस्तुहरूको आधारमा विभिन्न मासिक र साप्ताहिक रुपमा फरक फरक क्रियाकलापहरुमा नानीबाबुहरुलाई जोड्दै उक्त कक्षागत सिकाईलाई विषयसँगै जोड्दै विभिन्न प्रयोगात्मक क्रियाकलापहरु गर्दै आइरहेको छ । उक्त सिकाई उपलब्धीमुलक बनाउनको लागि कक्षा १ देखि कक्षा ७ सम्मका नानीबाबुहरूको सक्रियता र विशेष शिक्षकहरूको संयोजकता तथा अन्य शिक्षकहरूको सहयोगमा विद्यालयको कार्यक्रम हलमा “हाम्रो सेरोफेरो तथा सामाजिक विषयक प्रदर्शनी–२०८२”को आयोजना गरिएको थियो ।

प्रदर्शनीमा आ–आफ्नो कक्षाको प्रतिनिधित्व गर्दै हरेक कक्षाले विभिन्न स्टलहरु राखेका थिए । स्टलमा समुदाय, पेशा र आर्थिक क्रियाकलाप, हाम्रो पृथ्वी, नागरिक चेतना, कला संस्कृति, हाम्रो विगत, हाम्रो समुदाय, हाम्रा परम्परागत उपकरण, चाडपर्व लगायतका विषयवस्तुहरु प्रत्यक्ष अवलोकन गरी सम्पूर्ण नानीबाबुहरुले सिक्ने अवसर पाए ।

परम्परागत पोशाकहरू, डोको, नाम्लो, टुकी, रेडियो, हलो–जुवा देखि हाम्रो पृथ्वी समेत स्टलमा राखिएको थियो । उक्त स्टलमा रहेका नानीबाबुहरुले प्रदर्शनीमा राखेका विभिन्न सामग्री तथा वस्तुहरूबारे अवलोकनकर्ताहरुलाई प्रष्ट रुपमा व्याख्या गरी बुझाउने प्रयास गरेका थिए । लोप हुन लागेका वस्तु सामग्री तथा नागरिक चेतनाको बारेमा संविधान तथा कानुन र नागरिक चेतनाको बारेमा नानीबाबुले प्रष्ट पारेका थिए । जसमा विभिन्न चेतनामूलक प्ले कार्डहरु समेत प्रदर्शनमा राखिएको थियो ।

प्रदर्शनीमा हाम्रो सेरोफेरो तथा सामाजिक विषयसँग जोड्दै हरेक सिकाइको इकाइलाई परियोजना र प्रयोगात्मक रुपमा प्रस्तुत गरिएको थियो । अतिरिक्त क्रियाकलाप इन्चार्ज मुकुन्द अधिकारीले यस प्रदर्शनीबाट नानीबाबुहरूले विशेष सिकाइ मात्र नभई प्रस्तुतिकरण, सामाजिकरणको ज्ञान र पूर्णरूपले विषयवस्तुहरुलाई सिकाउने उद्देश्य रहेको बताए ।
यस प्रकारका र अन्य अतिरिक्त क्रियाकलापहरुलाई प्रयोगात्मक रुपले नै सिकाई उपलब्धीमुलक हुनेमा दुई मत नरहेको विद्यालयका प्रिन्सिपल सरण चौलागाईंले जनाए । अब अर्को प्रदर्शनी गणित विषयसँग जोडेर हुने गरिने जानकारी प्रिन्सिपल चौलागाईंले जानकारी दिए ।