भारतमा गाडी दुर्घटनामा परी ४ नेपालीको मृत्यु, २ जना घाइते

भारतमा गाडी दुर्घटनामा परी ४ नेपालीको मृत्यु, २ जना घाइते भएका छन् । हिमाञ्जल प्रदेश, सिमला जिल्लाको कोटखाई नजिक गाडी दुर्घटना हुँदा चार जनाको मृत्यु र दुई जना घाइते भएका हुन् ।

दुर्घटनामा सल्यानको कुमाख गाउँपालिका-४ का ५० वर्षीय डिल्लीबहादुर शाही, ३६ वर्षीय एकेन्द्र शाही, २६ वर्षीय लक्ष्मी मल्ल शाही र ३३ वर्षीय राजेश विष्ट ज्यान गुमाएका छन् । दुर्घटनामा नवराज शाही र हिमबहादुर शाही घाइते भएका छन् । तीन जना मृतक एकै परिवारका रहेको जनाइएको छ ।

चालकले नियन्त्रण गुमाउँदा पिकअप जिप भीरमा खसेको प्रारम्भिक अनुसन्धान छ । घाइते भएका उनीहरु उपचारको क्रममा अस्पतालमा मृत्यु भएको हो । घाइते भएका दुई जनालाई उपचारपछि कोटखाई स्वास्थ्य केन्द्रबाट डिस्चार्ज गरिएको छ ।

भारतीय पत्रिका द हिन्दुस्तान टाइम्सका अनुसार घटनापछि भारतीय दण्ड संहिता (भारतीय न्याय संहिता) को धारा १०६ अन्तर्गत लापरबाहीका कारण मृत्यु हुने कसुरमा मुद्दा दर्ता गरेर थप अनुसन्धान भइरहेको डीएसपी सिद्धार्थ शर्माले बताएका छन् ।

शवलाई पोस्टमार्टमका लागि पठाइएको छ र मृतकका परिवारलाई खबर गरिएको प्रहरीले जनाएको छ ।